Redmi S2 launched in China

Kunal Rahangdale || May, 11

Kayi baar rumors mein aane ke baad, aaj finally Redmi S2 Xiaomi dwara China mein launch kiya gaya. Ye ek Android One smartphone hoga, aise rumors aaye zaroor the, lekin company ne unhein galat saabit kar diya hai. Redmi S2 ek affordable selfie smartphone hai jo aapko two storage variants mein milega.

China mein aaj ye smartphone 999 yuan (approx. 10,500 INR) ki shuruaati kimat par launch hua hai jo 3GB RAM aur 32GB ROM variant ki hai. Saath hi iska 4GB RAM aur 64GB storage variant 1299 yuan (around 13,500 INR) mein available hoga.

Redmi S2 mein 5.99 inch ki HD+ full view display hai jis par 2.5D curved glass moujood hai. Achhi baat ye hai ki affordable range mein bhi hybrid dual SIM na dekar is smartphone mein dedicated dual SIM slots aur ek microSD card slot diya gaya hai jo 256GB tak ka microSD card accept karta hai.

Redmi S2 ko power dene ke liye ismein Octa Core Qualcomm Snapdragon 625 14nm processor moujood hai jiski clock speed 2.0 GHz hai aur iske saath Adreno 630 GPU bhi diya gaya hai. Ismein Android 8.1 Oreo OS hai jo MIUI 9 par based hai aur iski battery capacity 3080mAh hai.

Ab agar camera ki baat karein to, Redmi S2 mein 12 MP ka primary rear camera hai jo PDAF, f/2.2 aperture, LED flash light ke saath aata hai aur saath hi secondary 5 MP camera bhi diya gaya hai. Is handset mein front par 16 MP ka selfie camera moujood hai.

Xiaomi Redmi S2 mein rear panel par fingerprint scanner par diya gaya hai. Iske connectivity options mein 4G VoLTE, Wi-Fi 802.11 a/b/g/n, Bluetooth 4.2, GPS / GLONASS, Micro USB port and 3.5mm audio jack.

Xiaomi Redmi S2 ke India launch ki abhi koi official news nahin hai, lekin ummid hai ki company ise isi mahine ke end tak Mi A2 ke saath India mein launch karegi.